Femínistafélag Íslands vill lýsa fullum stuðningi sínum við hverskyns mótmælum sem stjórn KSÍ hreyfir við áformum stjórnvalda í Suður-Afríku um að lögleiða vændi í aðdraganda HM 2010. Femínistafélaginu þykir leitt að suðurafrískir stjórnmálamenn skuli með þessu setja jafnaðarmerki á milli knattspyrnu og misnotkunar á konum. Þykir félaginu sjálfsagt að standa þétt við hlið knattspyrnusambanda, sem hlýtur að svíða að þessi tengsl séu neydd upp á þau. Femínistafélag Íslands veit það sem stjórnvöld í Suður-Afríku virðast ekki átta sig á — að hornsteinn knattspyrnunnar er mannvirðing — ekki stuðningur við ofbeldi.

Kæru femínistar – Til hamingju með daginn!

Í tilefni dagsins tekur Femínistafélag Íslands þátt í eftirfarandi viðburðum:

Undirritun samnings um Jafnréttissetur og Jafnréttisskóla í Utanríkisráðuneytinu kl 09:30
Afhendingu Bleiku steinanna við Styttu Jóns Sigurðssonar kl 11:00
Afhendingu styrkjar FÍ í Konukoti kl 12:00

Við minnum á kvennagönguna sem hefst hjá Bríetarmerkinu kl 16:15
Og móttökuna hjá Kvenréttindafélagi Íslands kl 17:00

Málum bæinn bleikan og klæðumst bleiku!

Baráttukveðjur,
Femínistafélag Íslands

Í tilefni af dómi Héraðsdóms Reykjavíkur í máli Ásgeirs Þórs Davíðssonar gegn Jóni Trausta Reynissyni og Ingibjörgu Dögg Kjartansdóttur sendir Femínistafélag Íslands frá sér eftirfarandi ályktun:

Femínistafélag Íslands lýsir undrun og vonbrigðum vegna nýfallins dóms Héraðsdóms Reykjavíkur en í dómnum er stefndu gert að greiða stefnanda 1,7 milljónir króna í miskabætur og málskostnað vegna ærumeiðandi ummæla.

Femínistafélagið telur ljóst á dómi Héraðsdóms að litið hafi verið fram hjá alþjóðlega viðurkenndri skilgreiningu á mansali. Hugtakið mansal er almennt skilgreint sem verslun með fólk, með eða án samþykkis þess, ef salan byggist á varnarleysi viðkomandi. Samkvæmt rannsókn sérfræðinga á samningum íslenskra nektarklúbba við nektardansmeyjar hefur sannast að konur sem starfað hafa á nektarklúbbunum hafi verið seldar mansali. Því er ljóst að Héraðsdómur lítur fram hjá sérfræðiþekkingu á málaflokknum.